Saturday, June 1, 2019

මට මහා තනිකමක් දැනුනා



ජීවිතේ පැද යද්දි ඔරුවක
හඳක් පායා ඇවිත් තිබුනා
නේක සැඩ රැලි සුලං හමුවෙත්
එළිය දී හඳ ළඟම දිලුනා

වැඩිමනක් කයිවාරු නැතුවට
ජීවිතේ දුක දෙකට බෙදුනා
නොකියාම බැස යද්දි ඒ හඳ
මට මහා තනිකමක් දැනුනා

Monday, September 24, 2018

හදවත







විටින් විට රිදුමක් දිදී තද මොනවදෝ මට කියන්නේ දැන්
මාත් එක්කම මෙතෙක් කල්හිඳ ඉහිලු දුක්ගිනි බර වැඩිද දැන්
නොකීවට මං උඹත් දන්නව මගේ පණනළ මටත් ඇති දැන්
තරහ නෑ මං දරාගන්නට බැරිම නම් උඹ පැලී පලයන්

Tuesday, April 24, 2018

බැඳෙමි ඔබ වෙත





බැඳෙමි ඔබ වෙත

සීතලට තනිකම දැනෙද්දී මුවින් සුසුමන් පිටවුනා
රැය උදාවී පාළු යහනෙදි අනේ මට ඔබ සිහිවුනා
කදෝපැණියකු රුවක් අභියස දුක කියා මා වැළපුනා
ඔබේ ළයමත හිස හොවන්නට අදත් මට පිං මදිවුනා..

වැටෙන හැම හුස්මක්ම ගානෙත් මතක් වෙන්නෙම ඔබේ වගමයි
ඇහෙන හැම හඬකටම වැඩියෙන් පතන්නෙත් මම ඔබේ හඬමයි
දකින හැම රූපෙකම හෙව්වෙත් මා සිතේ ඇඳි ඔබේ රුවමයි
පැතුව හැම පැතුමකම තිබුනෙත් මා ඔබේමයි ඔබ මගේමයි....

විවර කෙරුවෙමි ප්‍රේමයට මම හදේ දොරගුළු ඔබේ නාමෙන්
දිනෙන් දින දළුලාවි තව තව සකි සඳේ ඒ කිමද නාසන්
බැඳෙමි ඔබ වෙත වෙළෙමි ඔබ ළඟ සියදහස්වර මා සිතින්
මමම නොදනිමි නිරුත්තර වෙමි ඒ මගේ ප්‍රේමය ඉතින්..

සතුට සැනසුම ගෙනෙයි ඔබ මට දකින ස්වප්නෙක දී පවා
හිතට දුක්බර මොහොත දුරලයි ඔබෙන් ලද සිපුමක් පවා
රැයේ සුවබර නින්ද ගෙනදෙයි ඇසිල්ලක ඇමතුම පවා
ගෙනෙයි දහිරිය ඔබ මගේ ළඟ හිඳියි යන හැඟුමක් පවා..

Wednesday, March 7, 2018

අහංකාර උඹ


            




              මතකයි එක හැන්දෑවක උඹ ආවා අපේ ගෙදර
              ඉගිලී ගොස් අතරමංව හෙම්බත් වීලා හොඳටම
              කෙඳිරිගගා තුරු මුදුනක විඩාපත්ව හතිලන විට
              මං හිතුවා බිම ඉඳගෙන උඹේ හීන ඉටුකරන්න...

              උඹ කියනා දුක අහගෙන උඹේ කඳුළු පිසදම දම
              පාට පාට කොල අලවා උඹ හැඩ කෙරුවෙමි හෙමිහිට
              තව ටික දවසයි තිබුනේ උඹ රජවෙන දවස එන්න
              උඹේ වරිගෙ තරඟ බිමක උඹට ඔටුනු පළඳවන්න...

              කඩතොළු වූ බැමි තදකර උඹ සවිමත් බව දැනගෙන
              නිල් අහසට යන්න දුන්නෙ පියාඹන්න පුරුදුවෙන්න
              නූල කඩන් යන්න ගියේ ආයෙත් උඹ කලින් වගෙම
              ඔය හිතුවක්කාර වුනේ අනේ උඹට පිං නැතුවට...

             මං අලවපු කොලේ පාට වැහිකෝඩෙට හේදුනාද
             පුංචි වරල් උඹට දැම්ම උඩු හුළඟෙදි කොහි ගියාද
             මං දන්නව තුරු මුදුනක උඹ ආයෙත් ඇති අඬ අඬ
             කිරුළු උඹට හිමි නැතුවැති සරුංගලේ අහංකාර...

Wednesday, February 14, 2018

බොළඳ ප්‍රේමය...







මැනබලන්න එපා සබඳ
වැටෙන කඳුළු බරද කියා
සිනාසෙන්න එපා ඉතින්
මෙච්චර බොළඳයිද කියා...

නොදැක ඉන්න එක සතියක්
හරියට මට කල්ප හැටක්
අමතපු නැති එක දවසක්
සිතට මගේ නෑ විසුමක්...

දහසක් වැඩ අතරෙදි වුව
එයි සිහියට ඔබ හොඳින්ද?
කෑමෙදි බීමෙදි පළමුව
හිතෙයි අනේ ඔබ කෑවද?...

ඔබ පොඩ්ඩක් බැන්න විටදි
රිදිලා මගෙ හිත හොඳටම
අනේ අපොයි කියා හිඳී
ලෝකෙ කඩන් වැටුන ලෙසට...

ඇස් රතු කරගෙන අඬ අඬ
ඔයා කරන විහිළු වලට
මම ඉන්නෙමි එලි වෙන තුරු
නොකා නොබී හිතේ දුකට...

ඒක මගේ බොළඳ කමද
නැතිනම් ආදරේ හැටිද
ඔබේ ළඟදි දැනෙන හුරුව
සංසාරික බැඳීමක්ද...

Thursday, November 17, 2016

ඔබ සහ මම



ඔබ සහ මම




අපවිත්‍ර ජල තලය
පරදවා නැග ආපු පොහොට්ටුව
මම
සුපිරිසුදු සියපත් පොහොට්ටුව...

සටකපට දුස්සීල
පැණි උරා පැනදුවන වන බඹර
ඔබ
පොහොට්ටුව රිදවූ වන බඹර...